Ońtústik Qazaqstan oblysyndaǵy 1038 bilim uıymynda «El júregi – Astana» atty saltanatty sońǵy qońyraý sharasy ótti. Atalǵan mektepterden búgin 33766 oqýshy túlep ushty. Bolashaqqa qadam basqan bitirýshi túlekterdi quttyqtaý úshin oblys ákimi Janseıit Túımebaev Hımıa bıologıa baǵytyndaǵy N.Nazarbaev zıatkerlik mektebiniń sońǵy qońyraý sharasyna qatysty.
Saltanatty jıynda sóz alǵan óńir basshysy barsha ońtústikqazaqstandyq mektep bitirýshi túlekterdi quttyqtap, dańǵyl jolǵa qadam basqan bolashaq azamattarǵa aq jol tiledi.
«Sizder Elbasy armandaǵan «Máńgilik el» - ıdeıasynyń qurylysshylary ekenderińizdi eshýaqytta esten shyǵarmańyzdar. Elbasy óziniń halyqqa Joldaýynda jastardy bilimdi, eńbekqor, bastamashyl, belsendi bolýǵa jas kezinen bastap daǵdylanýyn basty nazarǵa aldy. Memleket júzege asyryp jatqan túbegeıli reformalar men atqaryp jatqan qyrýar isterdiń bári Sizder úshin jasalynýda», - dedi Janseıit Túımebaev.
Sonymen qatar, aımaq basshysy «Nazarbaev Zıatkerlik mektepteri» derbes bilim berý uıymy zıatker urpaqty tárbıeleýde tek mektep qabyrǵasymen shektelmeı, bilim berýdegi úzdik tájirıbeleri men jobalaryn qala, oblys, respýblıka kólemine taratýda keńinen atsalysyp jatqanyna toqtaldy.
Budan ózge, oblys basshysy mektep kitaphanasynyń qoryna «Jahan tanyǵan jeti tulǵa», «Túrkitanýdyń tarıhı-lıngvıstıkalyq negizderi» atty týyndylardy tartý etti. Sondaı-aq, urpaq tárbıesi úshin ter tógip júrgen birqatar ustazdardy marapattady.
Aıta keterligi, bıyl 12 jyldyq bilim júıesimen oqyǵan oqýshylardyń alǵashqy túlekteri mektep bitirdi. Aǵymdaǵy jylǵy oqý jylynda Hımıa –bıologıa baǵytyndaǵy Nazarbaev zıatkerlik mektebin 97 túlek aıaqtady. Olardyń 30-dan astamy sheteldik JOO-na qujat tapsyryp, qazirgi tańda 17 túlek tegin oqý grantyna ıe bolǵan. Bul álemdik reıtıńtiń úzdik 100 ýnıversıtetine kiretin Amerıka, Germanıa, Koreıa, Qytaı, Reseı, Kanada elderiniń joǵary oqý oryndary.
Jalpy bıylǵy oqý jylynda óńirimizdegi 1038 mektepte 634 myńǵa jýyq oqýshy bilim aldy. Onyń ishinde 33766 oqýshy mektepti bıyl bitiredi. Respýblıkadaǵy bitirýshi 147 myńnan asa oqýshynyń árbir besinshisi Ońtústik óńiriniń túlegi.
